Глас 1 господи воззвах

Глас 1 господи воззвах

Октоих. Глас 1.
Господи воззвах.
На 10:Стих:Изведи из темницы душу мою / исповедатися Имени Твоему.
Вечерния наша молитвы / приими Святый Господи, / и подаждь нам оставление грехов // яко Един еси явлей в мире воскресение.
Стих: Мене ждут праведницы, / дондеже воздаси мне.
Обыдите людие Сион, / и объимите его, / и дадите славу в нем воскресшему из мертвых / яко Той есть Бог наш, // избавлей нас от беззаконий наших.
На 8: Стих: Из глубины воззвах к Тебе, Господи, / Господи услыши глас мой.
Приидите людие, / воспоим, и поклонимся Христу, / славяще Его из мертвых воскресение: / яко Той есть Бог наш, // от прелести вражия мир избавлей.
Стих: Да будут уши Твои / внемлюще гласу моления моего.
Веселитеся небеса, вострубите основания земли, / возопийте горы веселие: / се бо Еммануил грехи наша на кресте пригвозди / и живот даяй, смерть умертви, / Адама воскресивый, // яко Человеколюбец.
На 6:Стих: Аще беззакония назриши, Господи, Господи кто постоит /
Яко у Тебе очищение есть.
Плотию волею распеншагося нас ради, / пострадавша и погребенна, / и воскресша из мертвых, / воспоим глаголюще: / утверди православием церковь Твою Христе, / и умири жизнь нашу, // яко Благ и Человеколюбец.
Стих: Имене ради Твоего потерпех Тя, Господи, потерпе душа моя в
слово Твое, / упова душа моя на Господа.
Живоприемному Твоему гробу предстояще недостойнии, / славословие приносим / неизреченному Твоему благоутробию, Христе Боже наш: / яко крест и смерть приял еси Безгрешне, / да мирови даруеши воскресение, // яко Человеколюбец.
Стих: От стражи утренния до нощи, от стражи утренния / да уповает
Израиль на Господа.
Иже Отцу собезночальна и соприсносущна слова, / от девическа чрева произшедшаго неизреченно, / и крест и смерть нас ради волею приемшаго, / и воскресша во славе, / воспоим глаголюще: / Живодавче Господи слава Тебе, // Спасе душ наших.
Октоих.

Глас 1.
На стиховне.
Страстию Твоею Христе, / от страстей свободихомся, / и воскресением Твоим из истления избавихомся, // Господи, слава Тебе.
Стих: Господь воцарися, / в лепоту облечеся.
Да радуется тварь, небеса да веселятся, / руками да восплещут языцы с веселием: / Христос бо Спас наш, / на кресте пригвозди грехи наша: / и смерть умертвив живот нам дарова / падшаго Адама всероднаго воскресивый, // яко Человеколюбец.
Стих: Дому Твоему подобает святыня / Господи в долготу дний.
Жены мироносицы, мира носяща, / со тщанием и рыданием гроба Твоего достигоша, / и не обретша пречистаго тела Твоего / от Ангела же уведевша новое и преславное чудо, / апостолом глаголаху: // воскресе Господь, подая мирови велию милость.
Слава, и ныне, Богородичен:
Се исполнися Исаино проречение: / Дева бо родила еси / и по рождестве, яко прежде рождества, пребыла еси, / Бог бо бе рождейся, / темже и естества новопресече, / но, о Богомати, моления Твоих рабов, / в Твоем храме приносимая Тебе, не презри, / но яко Благоутробнаго Твоима рукама носящи, / на Твоя рабы умилосердися // и моли спастися душам нашим.
( На стиховне )
Богородичен, глас 1:
Се исполнися Исаино проречение: / Дева бо родила еси / и по рождестве, яко прежде рождества, пребыла еси, / Бог бо бе рождейся, / темже и естества новопресече, / но, о Богомати, моления Твоих рабов, / в Твоем храме приносимая Тебе, не презри, / но яко Благоутробнаго Твоима рукама носящи, / на Твоя рабы умилосердися // и моли спастися душам нашим.
Октоих. Глас 1.
Тропарь.
Камени запечатану от иудей, / и воином стрегущим Пречистое Тело Твое, / воскресл еси тридневный Спасе, / даруяй мирови жизнь. / Сего ради Силы небесныя вопияху Ти, Жизнодавче: / слава воскресению Твоему Христе, / слава Царствию Твоему, // слава смотрению Твоему Едине Человеколюбче.
Октоих. Глас 1.
Кондак.
Воскресл еси яко Бог из гроба во славе, / и мир совоскресил еси; / и естество человеческое яко Бога воспевает Тя, / и смерть исчезе; / Адам же ликует, Владыко, / Ева ныне от уз избавляема / радуется, зовуще: // Ты еси, иже всем подая, Христе, воскресение.
Октоих. Глас 1.
Хвалитны.
Стих:Сотворити в них суд написан: / слава сия будет всем преподобным Его.
Поем Твою Христе, спасительную страсть, // и славим Твое воскресение.
Стих: Хвалите Бога во святых Его, / хвалите Его во утвержении силы Его.
Крест претерпевый, / и смерть упразднивый, / и воскресый из мертвых, / умири нашу жизнь Господи, // яко Един Всесилен.
Стих: Хвалите Его на силах Его, / хвалите Его по множеству величествия Его.
Адама пленивый, / и человека воскресивый, / воскресением Твоим Христе, / сподоби нас чистым сердцем, // Тебе пети и славити.
Стих: Хвалите Его во гласе трубнем, / хвалите Его во псалтири и гуслех.
Боголепное Твое снизхождение славяще, / поем Тя Христе, / родился еси от Девы, / и не разлучен был еси от Отца, / пострадал еси яко человек, / и волею претерпел еси крест, / воскресл еси от гроба, / яко от чертога произшед да спасеши мир, // Господи, слава Тебе.
Стих: Хвалите Его в тимпане и лице, / хвалите Его во струнах и органе.
Егда пригвоздился еси на древе крестнем, / тогда умертвися держава вражия: / тварь поколебася страхом Твоим: / и ад пленен бысть державою Твоею: / мертвыя от гроб воскресил еси, / и разбойнику рай отверзл еси: // Христе Боже наш, слава Тебе.
Стих: Хвалите Его в кимвалех доброгласных, хвалите Его в кимвалех восклицания, / всякое дыхание да хвалит Господа.
Рыдающа со тщанием гроба Твоего дошедша честныя жены, / обретша же гроб отверст, / и уведевша от ангела новое и преславное чудо, / возвестиша апостолом: / яко воскресе Господь, // даруяй мирови велию милость.
Октоих. Глас 8.
Тропарь.
С высоты снизшел еси Благоутробне,/ погребение приял еси тридневное, / да нас свободиши страстей, // Животе и воскресение наше, Господи, слава Тебе.
Октоих. Глас 8.
Кондак.
Воскрес из гроба, умершия воздвигл еси, / и Адама воскресил еси, / и Ева ликует во Твоем воскресении, / и мирстии концы торжествуют // еже из мертвых востанием Твоим Многомилостиве.
Тропарь, глас 8:
С высоты снизшел еси Благоутробне,/ погребение приял еси тридневное, / да нас свободиши страстей, // Животе и воскресение наше, Господи, слава Тебе.
Тропарь, глас 4:
Якоже вышния тверди благолепие, / и нижнюю показал еси красоту святаго селения славы Твоея, Господи, / утверди сие во век века / и приими наша в нем непрестанно приносимыя Тебе моления Богородицею, // всех Животе и Воскресение.
Тропарь, глас 8:
Благословен еси, Христе Боже наш, / Иже премудры ловцы явлей, / низпослав им Духа Святаго, / и теми уловлей вселенную. // Человеколюбче, слава Тебе.
Спаси от бед рабы Твоя, Богородице, / яко вси по Бозе к Тебе прибегаем, // яко к нерушимей стене и предстательству.
Призри благосердием, Всепетая Богородице, / на мое лютое телесе озлобление // и исцели души моея болезнь.
Молите Бога о нас вси святии, / яко мы усердно к вам прибегаем, // скорым молитвенникам о душах наших.

На стиховне стихиры воскресны, глас 1

12345678910Следующая ⇒

ОКТОИХ ВОСКРЕСНЫЙ

Гражданским шрифтом, отредактировано применительно к обучающемуся клиросу сельского прихода

ГЛАС ПЕРВЫЙ 2

ГЛАС ВТОРЫЙ 16

ГЛАС ТРЕТИЙ 29

ГЛАС ЧЕТВЕРТЫЙ 41

ГЛАС ПЯТЫЙ 55

ГЛАС ШЕСТЫЙ 68

ГЛАС СЕДЬМЫЙ 81

ГЛАС ОСЬМЫЙ 94

Воскресна служба 1-го гласа.

В субботу на велицей вечерни.

На Господи воззвах поем стихиры воскресны, глас 1.

Изведи́из темни́цы ду́шу мою́, / испове́датися Имене Твоему́.

Вече́рния на́ша моли́твы / приими́, Святы́й Го́споди, / и пода́ждь нам оставле́ние грехо́в, / я́ко Еди́н еси́ / явле́й в ми́ре Воскресе́ние.

Мене́ждут пра́ведницы, / до́ндеже возда́си мне.

Обыди́те лю́дие Сио́н, / и обыми́те Его́, / и дади́те сла́ву в нем Воскре́сшему из ме́ртвых: / я́ко Той есть Бог наш, / Избавле́й нас от беззако́ний на́ших.

Из глубины́воззва́х к Тебе́, Го́споди, / Го́споди, услы́ши глас мой.

Прииди́те лю́дие, / воспои́м, и поклони́мся Христу́, / сла́вяще Его́ из ме́ртвых Воскресе́ние: / я́ко Той есть Бог наш, / от пре́лести вра́жия мир Избавле́й.

Да бу́дут у́ши Твои́/ вне́млюще гла́су моле́ния моего́.

Весели́теся Небеса́, / воструби́те основа́ния земли́, / возопи́йте го́ры весе́лие: / се бо Емману́ил грехи́ на́ша на Кресте́ пригвозди́, / и живо́т дая́й, смерть умертви́, / Ада́ма Воскреси́вый, я́ко Человеколю́бец.

Аще беззако́ния на́зриши, Го́споди, Го́споди, кто постои́т; / я́ко у Тебе́очище́ние есть.

Пло́тию во́лею Распе́ншагося нас ра́ди, / Пострада́вша и Погребе́нна, / и Воскре́сша из ме́ртвых, / воспои́м глаго́люще:/ утверди́ правосла́вием Це́рковь Твою́, Христе́, / и умири́ жизнь на́шу, / я́ко Благ и Человеколю́бец.

Имене ра́ди Твоего́потерпе́х Тя, Го́споди, потерпе́душа́моя́в сло́во Твое́, / упова́душа́моя́на Го́спода.

Живоприе́мному Твоему́ гро́бу / предстоя́ще, недосто́йнии, / славосло́вие прино́сим / неизрече́нному Твоему́ благоутро́бию, Христе́ Бо́же наш: / я́ко Крест и смерть прия́л еси́, Безгре́шне, / да мирови да́руеши Воскресе́ние, / я́ко Человеколю́бец.

От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Иже Отцу́ Собезнача́льна, / и Соприсносу́щна Сло́ва, / от Деви́ческаго чре́ва Происше́дшаго неизрече́нно, / и Крест и смерть нас ра́ди во́лею Прие́мшаго, / и Воскре́сша во сла́ве, / воспои́м глаго́люще: / Живода́вче Го́споди, сла́ва Тебе́, / Спа́се душ на́ших.

Слава, и ныне, Богородичен:Всемирную сла́ву, / от челове́к Прозя́бшую, / и Влады́ку Ро́ждшую, / Небе́сную Дверь,/ воспои́м Мари́ю Де́ву, / Безпло́тных песнь, и ве́рных удобре́ние: / Сия́ бо яви́ся Не́бо, и Храм Божества́: / Сия́ прегражде́ние вражды́ разруши́вши, / мир введе́, и Ца́рствие отве́рзе. / Сию́ у́бо иму́ще ве́ры Утвержде́ние, / Побо́рника и́мамы из Нея́ Ро́ждшагося Го́спода. / Дерза́йте у́бо, дерза́йте лю́дие Бо́жии: / и́бо Той победи́т враги́, я́ко Всеси́лен.

Таже, Све́те Ти́хий: Прокимен:

На стиховне стихиры воскресны, глас 1.

Стра́стию Твое́ю, Христе́, / от страсте́й свободи́хомся, / и воскресе́нием Твои́м из истле́ния изба́вихомся, / Го́споди, сла́ва Тебе́.

Стих: Госпо́дь воцари́ся, / в ле́поту облече́ся.

Да ра́дуется тварь, небеса́ да веселя́тся, / рука́ми да воспле́щут язы́цы с весе́лием: / Христо́с бо Спас наш, на Кресте́ пригвозди́ грехи́ на́ша: / и смерть умертви́в, живо́т нам дарова́, / па́дшаго Ада́ма всеро́днаго Воскреси́вый, / я́ко Человеколю́бец.

Стих: Ибо утверди́вселе́нную, / я́же не подви́жется.

Царь сый небесе́ и земли́ непостижи́ме, / во́лею распя́лся еси́ за человеколю́бие. / Его́же ад срет до́ле, огорчи́ся, / и пра́ведных ду́ши прие́мша, возра́довашася: / Ада́м же, ви́дев Тя, Зижди́теля в преиспо́дних, воскре́се. / О чудесе́! Ка́ко сме́рти вкуси́ всех жизнь; / но я́коже восхоте́ мир просвети́ти зову́щий и глаго́лющий: / Воскресы́й из ме́ртвых, Го́споди, сла́ва Тебе́.

Стих: До́му Твоему́подоба́ет святы́ня, / Го́споди, в долготу́дний.

Жены́ мироно́сицы, ми́ра нося́ща, / со тща́нием и рыда́нием гро́ба Твоего́ достиго́ша, / и не обре́тша Пречи́стаго Те́ла Твоего́, / от Ангела же уве́девша но́вое и пресла́вное чу́до, / Апо́столом глаго́лаху: / воскре́се Госпо́дь, / подая́ мирови ве́лию ми́лость.

Слава, и ныне, Богородичен: Се испо́лнися Иса́иино прорече́ние, / Де́ва бо родила́ еси́, / и по Рождестве́ я́ко пре́жде Рождества́ пребыла́ еси́: / Бог бо бе Рожде́йся, / те́мже и естества́ новопресече́. / Но о Богома́ти! / Моле́ния Твои́х рабо́в, / в Твое́м хра́ме приноси́мая Тебе́ не пре́зри, / но я́ко Благоутро́бнаго Твои́ма рука́ма нося́щи, / на Твоя́ рабы́ умилосе́рдися, / и моли́ спасти́ся душа́м на́шим.

Таже, Ны́не отпуща́еши: и Трисвятое. По Отче наш:

В неделю на утрени.

По шестопсалмии Бог Госпо́дь, Тропарь воскресен, глас 1:

Ка́мени запеча́тану от иуде́й / и во́ином стрегу́щим Пречи́стое Те́ло Твое́, / воскре́сл еси́ тридне́вный, Спа́се, / да́руяй ми́рови жизнь. / Сего́ ра́ди Си́лы Небе́сныя вопия́ху Ти, Жизнода́вче: / сла́ва Воскресе́нию Твоему́, Христе́, / сла́ва Ца́рствию Твоему́, / сла́ва смотре́нию Твоему́, еди́не Человеколю́бче.

Богородичен:

Гаврии́лу, веща́вшу Тебе́, Де́во, ра́дуйся, / со гла́сом воплоща́шеся всех Влады́ка, / в Тебе́, Святе́м Киво́те, / я́коже рече́ пра́ведный Дави́д; / яви́лася еси́ ши́ршая небе́с, / поноси́вши Зижди́теля Твоего́.

/ Сла́ва Все́льшемуся в Тя, / сла́ва Проше́дшему из Тебе́, / слава Свободи́вшему нас рождество́м Твои́м.

По стихословии седальны воскресны, глас 1:

Гроб Твой, Спа́се, во́ини стрегу́щии, / ме́ртвии от облиста́ния я́вльшагося а́нгела бы́ша, / пропове́дающа жена́м воскресе́ние. / Тебе́ сла́вим тли потреби́теля, / Тебе́ припа́даем, Воскре́сшему из гро́ба, / и Еди́ному Бо́гу на́шему.

Стих: Воскресни́Го́споди Бо́же мой, да вознесе́тся рука́Твоя́, / не забу́ди убо́гих Твои́х до конца́.

Ко Кресту́ пригво́ждься во́лею, Ще́дре, / во гро́бе положе́н быв я́ко мертв, Животода́вче, / держа́ву стерл еси́, Си́льне, сме́ртию Твое́ю: / Тебе́ бо вострепета́ша вра́тницы а́довы, / Ты совоздви́гл еси́ от ве́ка уме́ршыя, / я́ко Еди́н Человеколю́бец.

Слава, и ныне : Ма́терь Тя Бо́жию све́мы вси Де́ву вои́стинну, и по Рождестве́ я́вльшуюся, / и́же любо́вию прибега́ющии к Твое́й бла́гости: / Тебе́ бо и́мамы гре́шнии предста́тельство, / Тебе́ стяжа́хом в напа́стех Спасе́ние, / Еди́ну Всенепоро́чную.

Таже, Блаже́ни непоро́чнии: Посем тропари: Ангельский собо́р:

По полиелее ектения, Ипакои, глас 1:

Разбо́йничо покая́ние рай окра́де, / плачь же мироно́сиц ра́дость возвести́, / я́ко воскре́сл еси́, Христе́ Бо́же, / подая́й ми́рови ве́лию ми́лость.

Степенны: антифон 1, глас 1, стихи повторяюще:

Внегда́ скорбе́ти ми, услы́ши моя́ боле́зни, / Го́споди, Тебе́ зову́.

Пусты́нным непреста́нное Боже́ственное жела́ние быва́ет, / мира су́щим су́етнаго кроме́.

Слава И ныне: Свято́му Ду́ху честь и сла́ва, / я́коже Отцу́ подоба́ет, ку́пно же и Сы́ну, / сего́ ра́ди да пое́м Тро́ице Единодержа́вие.

Канон. Песнь 1

Ирмос: Твоя́ победи́тельная десни́ца / Боголе́пно в кре́пости просла́вися: / та бо, Безсме́ртне, / я́ко всемогу́щая, проти́вныя сотре́, / Изра́ильтяном / путь глубины́ новосоде́лавшая.

Канон воскресный

Иже рука́ма пречи́стыма от пе́рсти / богоде́тельне испе́рва созда́в мя, / ру́це распросте́рл еси́ на кресте́, / от земли́ взыва́я тле́нное мое́ те́ло, / е́же от Де́вы прия́л еси́.

Умерщвле́ние подъя́л еси́ мене́ ра́ди, / и ду́шу сме́рти пре́дал еси́, / Иже вдохнове́нием боже́ственным ду́шу ми вложи́вый, / и отреши́в ве́чных уз, и совоскреси́в / нетле́нием просла́вил еси́.

12345678910Следующая ⇒

Дата добавления: 2016-03-26; просмотров: 679 | Нарушение авторских прав

Рекомендуемый контект:


Похожая информация:


Поиск на сайте:


Добавить комментарий

Ваш e-mail не будет опубликован. Обязательные поля помечены *